Esta exposición recolle case un centenar de obras multidisciplinares que realizan un percorrido pola historia da cidade
29 mar 2023 . Actualizado a las 05:00 h.«Lugo no tempo» é unha fusión entre a cultura galaica e a romana, o campo e a urbe. Todo iso que fai que a urbe amurallada teña un selo identificativo inconfundible. Ao longo do percorrido por esta exposición comisariada por Manuel Gago, que permanecerá aberta ao público ata o próximo 27 de maio na sede de Afundación, os visitantes poderán facer unha viaxe pola historia de Lugo a través dun centenar de pezas moi representativas de todos os tempos.
A mostra, inaugurada onte polo conselleiro de Cultura, Román Rodríguez, e o xerente da Afundación, Pedro Otero, fai unha escolma dos tesouros mellor salvagardados das institucións máis emblemáticas da cidade, como son: o Museo Provincial, o Museo Diocesano, o Arquivo Histórico Provincial, a Biblioteca Municipal ou o Círculo das Artes.
A proposta válese dunha combinación de materiais físicos e tecnoloxías interactivas, con planos, mapas, documentos históricos, obxectos de alta cultura e cotiáns con gran carga simbólica, obras de arte, fotografías e publicacións.
Toda esta documentación permite mergullarse na historia da urbe, dende as orixes ata os grandes cambios urbanísticos de finais do século XIX e o despegue do século XX, trasladando ao visitante a espazos decisivos dunha cidade marcada pola presenza da muralla romana, declarada Patrimonio da Humanidade pola Unesco no ano 2000.
Trátase da terceira das sete exposicións que conforman o proxecto «Cidades no tempo», que continúa reivindicando a identidade urbana de Galicia.
Neste senso, o conselleiro de Cultura, Educación, FP e Universidades, Román Rodríguez, destacou no acto de inauguración que a proposta permite afondar na «realidade emblemática que ten a cidade de Lugo, da que emanan algúns dos símbolos e identidades cos que hoxe se recoñece a Galicia en todo o mundo».
Así, o titular de Cultura fixo fincapé na importancia dunha urbe «construída nun equilibrio entre a tradición e a modernidade, na que se souberon respectar as orixes incorporándoas á súa organización territorial».
Pola súa parte, o director xerente de Afundación, Pedro Otero, expresou a súa satisfacción por un proxecto «moi atractivo». Así, explicou que «este é un inmoble completamente integrado nun dos espazos estratéxicos da cidade, nun edificio testemuñal da historia desta cidade, unha urbe fortemente caracterizada pola súa esencia romana».