Quince composicións florais participan no acto organizado no centro da localidade polo concello
05 may 2022 . Actualizado a las 20:09 h.A festa dos Maios sobreviviu á pandemia en Monforte. Esta localidade é unha das que conservan en Galicia esta celebración tradicional de primavera, pero non a fixo no 2020 e tampouco no 2021. A covid-19 non deixaba, pero neste 2022 o Concello decidiu aproveitar o alivio das restriccións para volvel convocar a tradicional concentración de Maios no centro da localidade e a animar aos centros escolares e aos veciños en xeral a volvela celebrar. O chamamento tivo eco, porque a participación foi alta. O día tamén acompañou cunha tarde soleada e primaveral
Un total de 15 composicións feitas con flores e outros compoñentes vexetais foron trasladadas a primeira hora da tarde deste xoves á praza de España desde diferentes puntos da cidade. Algunhas estaban feitas nos colexios, pero tamén había un bon número delas preparadas por particulares nas súas casas.
Ás cinco e media da tarde, unhas duascentas persoas estaban xa na praza arredor dos 15 maios. O único grupo que este ano levaba coplas preparadas foi o do colexio da Gándara. Un grupo formado basicamente por alumnos e reforzado á guitarra por un profesor cantounas na parte alta da praza ante o público que estaba abaixo.
Este ano non había concurso, porque o Concello decidiu repartir cartos por igual entre todos os participantes. Os responsables municipais trataban así de animar a participación, por se acaso estes dous anos de parón enfriaran o interese da xente. Só polo feito de se inscribir e tomar parte no acto da praza de España, os artífices de cada Maio recibirán 75 euros. A concelleira de Cultura, Marina Doutón, púxolle o punto e final ao acto agradecendo a participación e instando a todos os presentes a acudir tamén á festa do ano que vén.